TRIPOLI/ATHENS, Febraayo 22, 2026 – Ugu yaraan sideed ruux oo tahriibayaal ah ayaa meydkooda laga helay xeebaha dalalka Liibiya iyo Giriigga, iyadoo ay sii kordhayaan dhimashooyinka ka dhasha safarrada halista ah ee badda Mediterranean-ka.
Shan ka mid ah meydadka ayaa laga helay magaalada xeebta leh ee Qasr al-Akhyar, oo qiyaastii 73 kiiloomitir bari ka xigta caasimadda Liibiya ee Tripoli. Hassan Al-Ghawil, madaxa baarista ee saldhigga booliiska Qasr al-Akhyar, ayaa warbaahinta u sheegay in dadka deegaanka ay ku wargeliyeen booliiska helitaanka meydadka oo ku soo caariyay xeebta Emhamid Al-Sharif.
Al-Ghawil ayaa xaqiijiyay in shanta qof ay ku jireen laba haween ah, dhammaantoodna lagu tilmaamay inay ahaayeen dad maqaarkoodu madow yahay. Wuxuu sidoo kale xusay in dadka deegaanka ay arkeen meyd ilmo yar oo xeebta soo gaaray balse dib ugu laabtay badda sababo la xiriira hirar xooggan, taasoo keentay in ciidanka ilaalada xeebaha loo diro baaritaan dheeraad ah. Mas’uuliyiintu waxay sheegeen in suurtagal ay tahay in meydad kale ay soo gaaraan xeebaha.
Dhanka kale, mas’uuliyiinta Giriigga ayaa ku dhawaaqay in saddex qof oo kale laga helay xeebaha jasiiradda Crete, kaddib markii doon alwaax ah oo siday muhaajiriin iyo magangalyo doon ay ku degtay halkaas. Wakaaladda wararka ee Athens ayaa Sabtidii sheegtay in ugu yaraan 20 qof la badbaadiyay, intooda badanna ay ahaayeen Masaari iyo Suudaan, ayna ku jireen afar carruur ah oo aan qaan-gaarin.
Dhacdadan ayaa imaneysa toddobaadyo kaddib markii Hay’adda Caalamiga ah ee Socdaalka ay sheegtay dhimashada 53 muhaajiriin ah, kaddib markii doon caag ah oo ay saarnaayeen 55 qof ay ku degtay xeebta magaalada Zuwara ee galbeedka Tripoli.
Liibiya ayaa tan iyo 2011, markii uu burburay nidaamkii Mucammar Al-Qadaafi, noqotay marin ay maraan muhaajiriinta ka cararaya colaadaha iyo faqriga si ay u gaaraan Yurub. Khilaafaadka hubeysan ee dalka ka taagnaa tan iyo 2014 ayaa sii adkeeyay xaaladda muhaajiriinta, kuwaas oo wajahaya khataro badan inta ay ku guda jiraan safarrada badda Mediterranean-ka.
