Jalalaqsi, Gobolka Hiiraan — Dagaal culus ayaa maanta ka qarxay degmada Jalalaqsi ee gobolka Hiiraan, kaas oo u dhexeeya ciidamo taabacsan maamulka degmada iyo maleeshiyaad hubeysan oo ka soo jeeda mid ka mid ah beelaha deegaanka.
Sida ay sheegeen goobjoogayaal iyo ilo deegaanka ah, iska hor-imaadka ayaa ka dhashay kadib markii maamulka degmada Jalalaqsi uu xiray nabadoon caan ka ah degmada, tallaabadaas oo dhalisay xiisad degdeg ah. Maleeshiyaad hubeysan ayaa la sheegay inay isku dayeen inay si xoog ah ku sii daayaan nabadoonka la xiray, taas oo keentay in dagaal hubeysan uu qarxo.
Dagaalka oo qaatay saacado badan ayaa saameyn ku yeeshay guud ahaan degmada, iyadoo rasaas culus laga maqlayay xaafado kala duwan. Wararka la helayo ayaa xaqiijinaya in ugu yaraan saddex qof ay ku dhinteen iska hor-imaadka, halka tiro kale oo dad ah, oo ay ku jiraan dad rayid ah, ay ku dhaawacmeen.
Qaar kamid ah odayaasha dhaqanka iyo waxgaradka deegaanka ayaa muujiyay walaac xooggan, iyagoo sheegay in dagaalka uu si lama filaan ah u billowday isla markaana uu cabsi geliyay shacabka. Waxay ugu baaqeen dhinacyada dagaallamaya inay joojiyaan colaadda, si looga hortago khasaare hor leh.
Xaaladda amni ee Jalalaqsi ayaa weli ah mid kacsan, iyadoo labada dhinac ay is horfadhiyaan. Odayaal dhaqameed ayaa ku hawlan dadaallo nabadeed oo lagu doonayo in lagu qaboojiyo xiisadda, lana soo afjaro dagaalka.
Ilaa hadda, wax war rasmi ah kama soo bixin maamulka degmada Jalalaqsi oo ku saabsan sababta xarigga nabadoonka, khasaaraha rasmiga ah, iyo tallaabooyinka la qaadayo. Gobolka Hiiraan ayaa marar badan goobjoog u ahaa isku dhacyo hubeysan oo noocan oo kale ah, kuwaas oo inta badan saameyn weyn ku yeesha dadka rayidka ah.
