Moscow — Madaxweynaha Jamhuuriyadda Federaalka Ruushka, Vladimir Putin, ayaa maanta si rasmi ah u guddoomay warqadaha aqoonsiga safiirnimo ee Danjiraha cusub ee Jamhuuriyadda Federaalka Soomaaliya u fadhiya Ruushka, Mohamed A. Zubeyr, munaasabad ka dhacday aqalka Kremlin-ka ee magaalada Moscow.
Xafladda, oo ay ka qeyb galeen safiirro dhowr dal ah, ayaa astaan u ahayd bilowga rasmiga ah ee waajibaadka diblomaasiyadeed ee Danjire Zubeyr ee Ruushka. Danjiraha ayaa sheegay in gudbinta waraaqaha aqoonsigu ay tahay marxalad muhiim ah oo ka mid ah sooyaalka shaqadiisa, isla markaana uu sharaf weyn u arko matalaadda Jamhuuriyadda Federaalka Soomaaliya ee Ruushka.
Danjire Zubeyr ayaa uga mahadceliyay dowladda Ruushka soo dhoweynta diirran, isagoo xusay in tallaabadani ay muujinayso kalsoonida iyo ka go’naanshaha Soomaaliya ee horumarinta xiriir laba-geesood ah oo ku dhisan ixtiraam, is-faham iyo iskaashi wax-ku-ool ah. Wuxuu sidoo kale tilmaamay in isbeddellada caalamiga ah ee jira ay ka dhigayaan wada-hadalka iyo iskaashiga dalalka mid aad u muhiim ah.
Danjiraha cusub ayaa muujiyay rajadiisa ah in uu si firfircoon uga shaqeyn doono xoojinta xiriirka Soomaaliya iyo Ruushka, ballaarinta meelaha ay labada dal wadaagaan danaha istiraatiijiyadeed, iyo kobcinta iskaashi ku dhisan diblomaasiyad iyo wada-tashi joogto ah.
Ugu dambayn, Danjire Zubeyr ayaa u mahadceliyay taageerada uu ka helay dowladda Soomaaliya, isaga oo si gaar ah u xusay kalsoonida uu siiyay Madaxweynaha Jamhuuriyadda Federaalka Soomaaliya, Xasan Sheekh Maxamuud, kuna adkeeyay in uu u adeegayo danaha qaranka iyo xoojinta xiriirka saaxiibtinimo ee muddada dheer ka dhexeeya Soomaaliya iyo Ruushka.
