Tehran, Maarso 1, 2026 – Warbaahinta dowladda Iiraan ayaa si rasmi ah u xaqiijisay in Hoggaamiyihii Sare ee Jamhuuriyadda Islaamiga ah, Ayatollah Ali Khamenei, lagu dilay duqeyn cirka ah oo ka dhacday caasimadda Tehran, taas oo ay si wadajir ah u fuliyeen Mareykanka iyo Israa’iil.
Khamenei oo 86 sano jir ahaa ayaa hoggaanka dalka hayay tan iyo 1989, kadib geeridii Ayatollah Ruhollah Khomeini. Kahor intii uusan noqon hoggaamiyaha ugu sarreeya, wuxuu soo noqday madaxweynaha Iiraan xilligii dagaalkii Iran iyo Ciraaq ee 1980-meeyadii.
Wararka rasmiga ah ee laga baahiyay Tehran ayaa sheegay in weerarka lagu beegsaday xarunta uu deganaa hoggaamiyuhu, isla markaana ay ku geeriyoodeen xubno ka mid ah qoyskiisa, oo ay ku jiraan gabar uu dhalay, wiil uu soddog u ahaa, iyo gabar uu awoowe u ahaa. Dowladda Iiraan ayaa ku dhawaaqday 40 maalmood oo baroordiiq qaran ah.
Madaxweynaha Mareykanka, Donald Trump, ayaa ku dhawaaqay geerida Khamenei saacado ka hor inta aan warbaahinta Iiraan si rasmi ah u xaqiijin, isaga oo sheegay in dhacdadani ay siinayso shacabka Iiraan “fursad weyn” oo ay dalkooda dib ugula wareegaan.
Madaxweynaha Argentina, Javier Milei, ayaa isna ammaanay howlgalka wadajirka ah ee Mareykanka iyo Israa’iil, isaga oo ku tilmaamay Khamenei mid ka mid ah shakhsiyaadka ugu rabshadaha badan taariikhda casriga ah.
Dhanka kale, wararka ayaa sheegaya in Iiraan ay billowday jawaab militari oo xooggan, iyadoo gantaallo ku garaacday bartilmaameedyo ku yaalla dalalka Khaliijka Carabta, oo ay ku jiraan Imaaraadka Carabta. Qaar ka mid ah gantaalladaas ayaa la sheegay in la qabtay kahor inta aysan gaarin meelihii loo waday.
Ciidamada Israa’iil ayaa sidoo kale ku dhawaaqay in weerarro kale lagu dilay toddobo mas’uul oo sare oo ka tirsan milatariga Iiraan, oo ay ku jiraan Cali Shamhakhani, Maxamed Bakbour, iyo Wasiirka Difaaca Iiraan, Aziz Nasirzadeh. Sida ay warbaahinta CBS News sheegtay, weerarradaasi waxay ahaayeen kuwo qorsheysan oo ay si wadajir ah u fuliyeen Israa’iil iyo Mareykanka, iyadoo la beegsaday boqolaal bartilmaameedyo milatari.
Isbitaallada Tehran ayaa la geliyay xaalad degdeg ah, waxaana la hawlgeliyay qorshayaal gurmad si wax looga qabto khasaaraha ka dhashay duqeymaha. Dalalka Khaliijka qaarkood ayaa adkeeyay heegankooda amni, halka warbaahinta Shiinaha ay sheegtay in muwaadiniinteeda laga daad-gureynayo Iiraan.
Dhacdadan ayaa sare u qaaday xiisadda gobolka Bariga Dhexe, iyadoo xaaladdu ay weli kacsan tahay isla markaana jawaabaha milatari ee degdegga ah ay muujinayaan isbeddel weyn oo siyaasadeed oo ka dhacay gobolka.
