FEBRAAYO 28, 2026 (HOL) – Qaraxyo xooggan ayaa ruxay caasimadda dalka Iran ee Tehran subaxnimadii Sabtida, iyadoo qiiq iyo uuro madow ay cirka isku shareereen kadib markii Israa’iil ay shaacisay inay fulisay weerar ka dhan ah dalkaas.
Wasiirka Difaaca Israa’iil, Benny Gantz, ayaa ku dhawaaqay xaalad degdeg ah oo lagu soo rogay guud ahaan dalka Israa’iil. Go’aankan ayaa sababay in la joojiyo adeegyadii waxbarashada, isu-soo-baxyada, iyo goobaha shaqada marka laga reebo adeegyada muhiimka ah. Sidoo kale, militariga Israa’iil ayaa hawlgeliyay seeriyada digniinka ee dalka oo dhan, iyadoo shacabka looga digay suurtagalnimada in weerarro gantaallo ah looga soo jawaabo duqeyntaas.
Warbaahinta rasmiga ah ee Iran ayaa xaqiijisay in weerarradii ugu horreeyay ay sababeen khasaare dhimasho iyo dhaawac leh oo soo gaaray xubno ka tirsan ciidanka Ilaalada Kacaanka, oo ay ku jiraan saraakiil sare. Qaraxyo kale oo waaweyn ayaa sidoo kale laga soo sheegay magaalooyinka Qum, Isfahaan, Kermanshah, iyo Lorestan. Wararka ayaa intaas ku daraya in duqeymo dhanka cirka ah lala beegsaday goobo xasaasi ah oo ay ka mid tahay aagga qasriga madaxtooyada ee Tehran.
Dhanka kale, warbaahinta Israa’iil ayaa werisay in mas’uuliyiin sare oo Iiraani ah lagu bartilmaameedsaday howlgalkan, iyadoo la tilmaamay in weerarku uu qeyb ka yahay qorshe hawlgal oo socon doona muddo afar maalmood ah.
Madaxa guddiga amniga qaranka ee baarlamaanka Iran, Ibraahim Caziizi, ayaa ku hanjabay jawaab adag, isaga oo sheegay in Israa’iil ay bilowday dagaal aysan maareyn karin dhammaadkiisa. Wasaaradda caafimaadka Iran ayaa dhankeeda sheegtay in isbitaallada Tehran la geliyay heegan sare si loogu adeego dadka ay waxyeelladu ka soo gaartay qaraxyada.
Weerarkan ayaa kusoo beegmaya xilli xiisadda u dhaxaysa Iran, Israa’iil, iyo Mareykanka ay gaartay meeshii ugu sarreysay, inkasta oo maalmihii u dambeeyay ay socdeen dadaallo diblomaasiyadeed oo ku saabsan heshiiska nukliyeerka. Inkasta oo warbaahinta Israa’iil ay sheegtay in Mareykanku uu qeyb ka ahaa weerarkan, haddana weli ma jiro wax war ah oo si rasmi ah uga soo baxay dowladda Mareykanka.
