Madaxweynaha Maraykanka Donald Trump ayaa sheegay in militariga Maraykanku ay fuliyeen duqeymo xooggan oo dhimasho leh oo lagu beegsaday dagaalyahanno ka tirsan kooxda Dawladda Islaamka (IS) ee ka hawlgasha waqooyi-galbeed dalka Nigeria.
Qoraal uu Trump ku daabacay bartiisa Truth Social fiidkii Khamiistii, 25-ka Disembar 2025, ayuu ku sheegay in weerarradaasi ay ahaayeen kuwo si sax ah loo fuliyay, isaga oo IS ku tilmaamay “argagixiso arxan daran” oo beegsata dad rayid ah, gaar ahaan Masiixiyiin aan waxba galabsan.
Madaxweynaha Maraykanka ma uusan faahfaahin bartilmaameedyada si gaar ah loo duqeeyay ama waqtiga saxda ah ee ay weerarradu dhaceen. Hase yeeshee, Taliska Militariga Maraykanka ee Afrika (AFRICOM) ayaa xaqiijiyay in duqeynta lagu fuliyay codsi rasmi ah oo ka yimid dowladda Nigeria, isla markaana lagu dilay xubno ka tirsan Daacish.
Xoghayaha Difaaca Maraykanka, Pete Hegseth, ayaa sheegay in Washington ay uga mahadcelinayso dowladda Nigeria wada-shaqeynta iyo taageerada dhanka la-dagaallanka kooxaha xagjirka ah.
Weerarkan ayaa imanaya kaddib digniin uu Trump bixiyay bishii Nofeembar 2025, markaas oo uu sheegay in Maraykanku u diyaargaroobayo tallaabooyin militari oo ka dhan ah kooxaha jihaadiga ah ee ka hawlgala Nigeria. Wakaaladda Reuters ayaa hore u werisay in diyaaradaha sirdoonka Maraykanka ay tan iyo dhammaadkii Nofeembar duulimaadyo xog-ururin ah ka sameynayeen hawada Nigeria.
Dowladda Nigeria weli si rasmi ah ugama hadlin duqeymaha la sheegay in la fuliyay. Si kastaba ha ahaatee, masuuliyiin ka tirsan xukuumadda madaxweyne Bola Tinubu ayaa hore u sheegay in Nigeria ay soo dhaweynayso caawinta Maraykanka, balse ay muhiim tahay in la ixtiraamo madax-bannaanida dalka.
Kooxo caalami ah oo kormeera rabshadaha, sida hay’adda ACLED, ayaa sheegay in rabshadaha ka jira Nigeria ay saameyn ku yeeshaan Muslimiin iyo Masiixiyiin labadaba, isla markaana aysan jirin caddeyn muujinaysa in hal koox diimeed si gaar ah loo beegsado.
Nigeria ayaa muddo ka badan toban sano la daalaa-dhacaysay weerarro ay fuliyaan kooxaha hubeysan ee Boko Haram iyo Dawladda Islaamka ee Galbeedka Afrika (ISWAP), kuwaas oo sababay dhimashada kumannaan qof iyo barakaca dad badan.
Duqeyntan ka dhacday Nigeria ayaa ku soo beegmaysa xilli toddobaadkii hore Maraykanku uu sheegay inuu fuliyay weerar ballaaran oo ka dhan ah IS gudaha Suuriya, halkaas oo Taliska Dhexe ee Militariga Maraykanka (CENTCOM) uu sheegay in la beegsaday in ka badan 70 bartilmaameed.
