Washington / Minneapolis — Wasaaradda Maaliyadda Mareykanka ayaa bilowday baaritaan hordhac ah oo ku saabsan eedeymo aan la xaqiijin oo sheegaya in lacagaha dadweynaha ee Minnesota laga yaabo in si khaldan loo isticmaalay isla markaana ay gaareen kooxda maleeshiyada ah ee Al-Shabaab. Eedeymahan, oo ay faafiyeen qaar ka mid ah warbaahinta muxaafidka iyo siyaasiyiinta Jamhuuriga, ayaa kiciyay buuq siyaasadeed, inkastoo aan la helin wax caddeyn ah oo muujinaysa in Soomaali Mareykan ah ay ku lug lahaayeen ama in wax lacag ah ay gaartay kooxdaas.
Saraakiisha Mareykanka ayaa sheegay in baaritaanka yahay mid hordhac ah oo keliya, ilaa haddana wax caddeyn ah lama helin oo isku xiraya Soomaali-da Mareykan-ka iyo Al-Shabaab. Falanqeeyayaasha ayaa ku tilmaamay eedeymaha ay yihiin kuwo siyaasadeed oo aan xaqiiq ku dhisneyn, taasoo xoojinaysa in baaritaanka laftiisu uusan caddeyneynin wax khalad ah.
Hogaamiyayaasha bulshada Soomaaliyeed ee Minnesota ayaa si adag u diiday sheegashooyinkan, iyagoo ku tilmaamay kuwo aan sal iyo raad lahayn isla markaana takoor ku dhisan. Waxay ka digayaan in eedeymahan si aan cadaalad ahayn bulshadooda loogu bartilmaameedsaday, islamarkaana ay abuuri karaan cabsi iyo sumcad-darro aan loo baahnayn.
Khubarada amniga ayaa xusey in aysan jirin wax caddeyn rasmi ah oo taageeraya eedeymahan, waxayna sheegeen in sheekooyin la mid ah ay badanaa soo baxaan marka siyaasadda Mareykanka ay xiisad ku jirto. Qaar ka mid ah faallo-bixiyeyaasha internetka ayaa sidoo kale soo jeediyay in eedeymahan laga yaabo inay u adeegayeen sidii looga mashquulin lahaa dawaynaha doodaha kale ee ka jira siyaasadda Mareykanka, oo ay ku jiraan cadaadis cusub oo ku saabsan sii deynta faylasha la xiriira Epstein.
Baaritaanka Wasaaradda Maaliyaddu weli ma soo saarin wax go’aan ah, waxaana saraakiishu ku adkeysanayaan in aan la helin wax caddeyn ah oo muujinaya xiriir ka dhexeeya Soomaalida Mareykanka iyo maalgelinta argagixisada.
