Degmada Maxaas oo ka tirsan gobolka Hiiraan, kuna caan baxday halgankii lagula dagaallamay kooxda Al-Shabaab, ayaa sanadkan laga reebay liiska degmooyinka lagu qaadayo imtixaanka shahaadiga ah ee fasalka 12-aad. Go’aankan ayaa lagu eedeeyay inuu ka yimid Wasiirka Waxbarashada Federaalka Soomaaliya, Faarax Sheekh Cabdulqaadir, taasoo dhalisay caro iyo niyad jab baahsan.
Bulshada deegaanka Maxaas, gaar ahaan waalidiinta iyo geesiyaasha Macawiisleyda, ayaa si weyn uga xumaaday tallaabadan, iyagoo u arka in ilmahooda laga hor istaagay fursad waxbarasho oo ay xaq u lahaayeen. Dad badan ayaa aaminsan in go’aankan uu dhaawacayo sumcadda dowladda, isla markaana uu niyad jabinayo jiilka cusub ee kasoo jeeda deegaanada la xoreeyay.
Waxaa sidoo kale jira eedeymo la xiriira musuq iyo maamul xumo oo loo jeediyay Wasiir Faarax, iyadoo warar aan si rasmi ah loo xaqiijin sheegayaan in uu hantida wasaaradda u adeegsaday dano gaar ah, sida iibsashada guryo raaxo ah oo ku yaalla xaafadda Kilimani ee magaalada Nairobi.
Bulshada Soomaaliyeed ee ku nool Maxaas ayaa ugu baaqaysa dowladda in ay dib u eegto go’aankan, si loo ilaaliyo sinaanta waxbarasho iyo kalsoonida shacabka ee hay’adaha.
