MUQDISHO — Sarkaal ka tirsanaa Ciidamada Xoogga Dalka Soomaaliyeed (CXDS) ayaa ku dhintay qarax miino oo ka dhacay deegaanka Nambar 50 ee gobolka Shabeellaha Hoose, Jimcihii, December 26, 2025, sida ay xaqiijiyeen ilo kala duwan.
Sarkaalkan oo lagu magacaabi jiray Cabdiraxmaan Cabdullaahi, kuna caan ahaa naanaysta Sandhiiqo, ayaa ka mid ahaa saraakiisha da’da yar ee CXDS, kuwaas oo tababar ku soo qaatay xerada TURKSOM ee magaalada Muqdisho. Wararka ayaa sheegaya in miinadu haleeshay isaga oo ku guda jiray hawlo amni, taasoo sababtay dhaawac culus oo uu u geeriyooday waqti kooban kaddib.
Marxuumka ayaa maalmihii u dambeeyay si firfircoon uga qeyb qaadanayay howlgallo lagu sugayay amniga waddada muhiimka ah ee isku xirta Afgooye iyo Marka. Waxa uu la shaqeynayay ciidamada Dowladda Federaalka, kuwa deegaanka iyo askarta Midowga Afrika ee AUSSOM, isaga oo ka qeyb galay kulamo lagu xoojinayay amniga iyo isu-duwidda ciidammada ka howlgala aaggaas.
Door ka dib qaraxa, ma jirto weli wax war rasmi ah oo kasoo baxay Dowladda Federaalka Soomaaliya ama Dowlad-Goboleedka Koonfur Galbeed oo faahfaahinaya dhacdada. Si kastaba ha ahaatee, ciidamada dowladda ayaa billaabay howlgallo amni oo ay ka wadaan deegaannada ku dhow Nambar 50, si loo xaqiijiyo amniga loona baadi-goobo cidda ka dambeysay miinada.
Geerida sarkaalkan dhallinyarada ah ayaa kusoo beegmeysa xilli ay socdaan dadaallo lagu xoojinayo amniga gobolka Shabeellaha Hoose, gaar ahaan waddooyinka istiraatiijiga ah ee isku xira degmooyinka waaweyn ee gobolka.
