Ciidanka Hay’adda Sirdoonka iyo Nabadsugidda Qaranka ee NISA, oo howlgal qorsheysan ka fuliyay duleedka degmada Dayniile ee Gobolka Banaadir, ayaa sheegay inay gacanta kusoo dhigay xubno ka tiran Al-Shabaab kuwaas oo ku howlanaa in ay qaraxyo soo galiyaan magaalada Muqdisho.
Warsaxaafadeed ka soo baxay NISA ayaa lagu sheegay in howlgalka oo shalay galab dhacay lagu qabtay labo dhagar-qabe oo lagu kala magacaabo, Nuur Muxudiin Jibriil iyo Maxamed C/raxmaan Maxamuud.
“Xiliga gacanta lagu soo dhigayay waxaa ay ku howlanaayeen in ay soo geliyaneen magaalada, 8 miino oo isugu jira; 3 nooca soo boodda ah, 5 nooca dhejiska ah, iyo 2 bambo F1,” ayaa lagu yiri qoraalka ka soo baxay NISA.
Sidoo kale, howlgal qorsheysan oo ciidanka NISA, ay ka sameeyeen degmada Dharkeynley ayaa waxa ay kusoo qabteen dhagar-qabe lagu magacaabo Cali Maxamed Cabdi oo kooxda Al-Shabaab dhexdeeda looga yaqaanay Macruuf iyo Cali foowdo, kaas oo dhawaan ay maleeshiyaadka Al-Shabaab u soo direen magaalada Muqdisho si uu falal argagixiso uga fuliyo, kadib markii Sirdoonka Qaranku uu horey ugu guuleystay in uu soo afjaro Shabakadihii kooxda Al-Shabaab ee qaabilsaneyd dilalka iyo qaraxyada.
Warsaxaafadeedka NISA ayaa lagu gabagabeeyay in ciidanka Hay’adda Sirdoonka iyo Nabadsugidda Qaranka ee NISA ay xoojiyeen howlgallada lagu cirib-tirayo haraadiga Horjoogeyaasha iyo Maleeshiyaadka kooxda ee wali isku dayaya in ay maleegaan falalka argagixiso ee ka dhanka ah shacabka Soomaaliyeed.
