MUQDISHO — Wasiirka Arrimaha Dibadda ee Shiinaha, Wang Yi, ayaa mar kale adkeeyay in Beijing si buuxda u taageersan tahay midnimada, madax-bannaanida iyo wadajirka dhuleed ee Jamhuuriyadda Federaalka Soomaaliya, isaga oo si cad uga soo horjeestay isku day kasta oo lagu doonayo in Somaliland ay xiriir gaar ah la yeelato Taiwan si ay u raadiso gooni-isu-taag.
Hadalkan ayaa yimid kaddib wada-hadal taleefan oo Axaddii dhexmaray Wang Yi iyo Wasiirka Arrimaha Dibadda Soomaaliya, Cabdisalaam Dhaay, xilli uu wasiirka Shiinaha ku guda jiray booqasho uu ku marayay dalal ka tirsan qaaradda Afrika. Sida lagu sheegay war-saxaafadeedyo ay soo saareen labada dhinac, Shiinaha ayaa muujiyay go’aan adag oo ku aaddan sii xoojinta iskaashiga saaxiibtinimo ee uu la leeyahay Soomaaliya, gaar ahaan dhinacyada dhaqaalaha, amniga iyo difaaca.
Wang Yi ayaa sidoo kale casuumaad rasmi ah u fidiyay Madaxweynaha Soomaaliya, Xasan Sheekh Maxamuud, si uu booqasho ugu tago Beijing ugana qeybgalo Shirweynaha Labaad ee Shiinaha iyo Dowladaha Carabta. Wuxuu tilmaamay in sannadka is-dhaafsiga shacabka Shiinaha iyo Afrika uu yahay fursad muhiim ah oo lagu xoojinayo iskaashiga istiraatiijiga ah ee labada dal.
Intii uu socday wada-hadalka, wasiirka Shiinaha ayaa sidoo kale muujiyay taageerada Beijing ee hoggaaminta Soomaaliya ee Golaha Ammaanka ee Qaramada Midoobay bisha Janaayo, isaga oo xusay mas’uuliyadda wadajirka ah ee labada dal ka saaran ilaalinta nabadda iyo amniga caalamiga ah.
Dhankiisa, Wasiir Cabdisalaam Dhaay ayaa uga mahadceliyay Shiinaha taageerada joogtada ah ee uu siiyo Soomaaliya, gaar ahaan difaaca midnimada iyo madax-bannaanida dalka, la dagaallanka gooni-u-goosadka iyo argagixisada, iyo garab istaagga xasilloonida iyo horumarka qaranka. Waxa uu mar kale xaqiijiyay in Soomaaliya ay si buuxda ugu dheggan tahay mabda’a Hal-Shiinaha (One-China Policy).
Dhanka kale, Safaaradda Shiinaha ee Soomaaliya ayaa sheegtay in dib-u-dhigista booqashadii la filayay ee Wang Yi uu ku iman lahaa Muqdisho ay sabab u ahayd isbeddel jadwal iyo wadatashi saaxiibtinimo oo dhexmaray labada wasaaradood ee arrimaha dibadda, isla markaana aanay wax xiriir ah la lahayn xaalado amni.
