MUQDISHO — Dowladda Maraykanka ayaa ku dhawaaqday inay si ku-meel-gaar ah u hakisay dhammaan barnaamijyadii kaalmada iyo taageerada ee ay siin jirtay Dowladda Federaalka Soomaaliya, kaddib eedeymo la xiriira musuq-maasuq iyo si sharci-darro ah u isticmaalka gargaar bani’aadantinimo.
Bayaan ka soo baxay Waaxda Arrimaha Dibadda ee Maraykanka ayaa lagu sheegay in tallaabadan ay daba socoto dhacdo lagu eedeeyay in mas’uuliyiin ka tirsan dowladda federaalka ay burburiyeen bakhaar ay leedahay Hay’adda Cunnada Adduunka (WFP), isla markaana ay si sharci-darro ah ula wareegeen 76 tan oo raashin gargaar ah oo loogu talagalay dadka Soomaaliyeed ee nugul.
Maraykanka ayaa sheegay in uu leeyahay siyaasad “dulqaad la’aan ah” oo ka dhan ah khasaarinta, xatooyada iyo leexinta gargaarka naf-badbaadinta ah. Bayaanka ayaa lagu xusay in kaalmada la hakiyay aan dib loo bilaabi doonin ilaa Dowladda Federaalka Soomaaliya ay qaaddo mas’uuliyadda dhacdada lagu eedeeyay, isla markaana ay hirgeliso tallaabooyin cad oo lagu xaqiijinayo isla-xisaabtan iyo sixitaan.
Go’aankan ayaa imanaya xilli Soomaaliya ay wajahayso xaalad bani’aadantinimo oo aad u daran, iyadoo malaayiin qof ay saameeyeen abaaro, nafaqo-darro iyo baahi caafimaad. Hay’adda Cunnada Adduunka ayaa horay uga digtay in dhimista maalgelinta ay sii xumeyn karto qalalaasaha gaajada, isla markaana ay yareyn karto gargaarka la gaarsiinayo dadka ugu liita.
Maraykanka ayaa sanadkii la soo dhaafay ku deeqay in ka badan laba bilyan oo doollar Hay’adda Cunnada Adduunka, taas oo gargaar cunto siisa malaayiin qof oo ku nool dalal ay ka mid tahay Soomaaliya. Si kastaba ha ahaatee, Washington ma aysan caddeyn muddada ay socon doonto hakinta, iyo in barnaamijyada bani’aadantinimo ee loo maro Qaramada Midoobay iyo hay’adaha aan dowliga ahayn ay ka reeban yihiin go’aankan.
Dowladda Federaalka Soomaaliya weli kama aysan bixin jawaab rasmi ah eedeymaha ay soo jeedisay Dowladda Maraykanka. Hakinta kaalmada ayaa sidoo kale kusoo aadeysa xilli ay jireen walaacyo hore oo ay deeq-bixiyeyaashu ka muujiyeen maareynta iyo daah-furnaanta gargaarka Soomaaliya, oo ka mid ah dalalka ugu badan ee ku tiirsan taageerada caalamiga ah.
Mas’uuliyiin iyo hay’ado caalami ah ayaa ka digay in haddii aan si degdeg ah xal loogu helin arrintan, ay tallaabadan si weyn u saameyn karto dadaallada gargaarka, amniga iyo xasilinta ee dalka, xilli baahida bani’aadantinimo ay sii kordhayso.
