Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa si adag u cambaareeyay tallaabooyinka ay qaadday Somaliland, isagoo ku tilmaamay kuwo halis ku ah midnimada, madaxbannaanida iyo wadajirka dhuleed ee Soomaaliya.
Khudbad uu xalay u jeediyay shacabka Soomaaliyeed, madaxweynuhu wuxuu sheegay in maamuladii kala dambeeyay ee Somaliland ay marar badan ka leexdeen fursado wadahadal oo horseedi kari lahaa xal siyaasadeed, taas oo uu sheegay inay sii kala fogeysay dadka Soomaaliyeed. Wuxuu xusay in Dowladda Federaalka Soomaaliya ay mar walba ku adkaysatay in khilaafaadka siyaasadeed ee jira ay yihiin kuwo u dhexeeya shacabka Soomaaliyeed iyo dowladdooda, laguna xallin karo oo keliya wadahadal iyo is-afgarad qaran.
Madaxweyne Xasan Sheekh ayaa si gaar ah u dhaliilay heshiis is-afgarad (MOU) oo Somaliland la gashay Itoobiya, isagoo ku tilmaamay mid lama filaan ah oo dhaawacay rajadii wadahadalka, xilli ay jireen dadaallo kale oo lagu raadinayay xal siyaasadeed. Wuxuu ku eedeeyay maamulka Hargeysa inuu aad ugu nugul yahay faragelin shisheeye, gaar ahaan isku day kasta oo la xiriira raadinta aqoonsi dibadeed.
Madaxweynuhu wuxuu mar kale adkeeyay in Soomaaliya tahay dal madax-bannaan oo leh midnimo dhuleed aan la kala goyn karin, isagoo caddeeyay in aan dalka lagu kala jabin karin “warqad ama saxiix dal shisheeye.” Wuxuu intaas ku daray in isku dayada noocaas ah ay u adeegayaan dano shisheeye oo khatar ku ah amniga gobolka Geeska Afrika, Badda Cas iyo Bariga Dhexe.
Isagoo si gaar ah ula hadlayay shacabka ku nool gobollada waqooyi, madaxweynuhu wuxuu sheegay in aqoonsi dhab ah uu ka imaan karo oo keliya shacabka iyo dowladda Soomaaliyeed ee ay wadaagaan diin, dhaqan iyo dalnimo. Wuxuu ku booriyay hoggaanka Somaliland inay dib u milicsadaan waayo-aragnimada caalamiga ah, isagoo tusaale u soo qaatay dalal iyo deegaanno ay ka mid yihiin Koonfur Suudaan, Eritrea, East Timor, Taiwan iyo Catalonia, kuwaas oo muujinaya in aqoonsi caalami ah lagu gaari karo oo keliya heshiis siyaasadeed oo ay wada oggol yihiin dhinacyada ay khusayso.
Ugu dambayn, Madaxweyne Xasan Sheekh ayaa sheegay in Dowladda Federaalka Soomaaliya ay weli diyaar u tahay tanaasul iyo wadahadal dhab ah si loo helo midnimo qaran iyo dowladnimo wadajir ah. Wuxuu sidoo kale u mahadceliyay shacabka Soomaaliyeed meel kasta oo ay joogaan sida ay uga dhiidhiyeen tallaabooyinka uu ku tilmaamay kuwo khatar ku ah dalka, isaga oo mahadcelin u jeediyay beesha caalamka iyo ururrada caalamiga ah ee taageeray midnimada, madaxbannaanida iyo wadajirka dhuleed ee Soomaaliya.
