MUQDISHO, Febraayo 21, 2026 – Hay’adda Duulista Rayidka Soomaaliyeed, SCAA, ayaa shaqo joojin ku samaysay qaar ka mid ah diyaaradaha ka hawlgala gudaha dalka, kaddib kormeerro lagu ogaaday khaladaad farsamo iyo u hoggaansanaan la’aan heerarka ay dejisay Hay’adda Duulista Rayidka Adduunka, ICAO.
SCAA ayaa sheegtay in go’aankan uu yahay mid lagu xoojinayo badqabka duulimaadyada iyo kalsoonida rakaabka, isla markaana lagu hubinayo in shirkadaha duulimaadyadu ay u hoggaansamaan halbeegyada caalamiga ah.
Tallaabadan ayaa ka dambeysay dhacdo dhacday 10-kii Febraayo, markaas oo diyaarad ay maamuleysay shirkadda Starsky Aviation ay cilad farsamo la kulantay wax yar kaddib markii ay ka duushay Garoonka Diyaaradaha Aadan Cadde ee Muqdisho. Diyaaradda ayaa ka baxday dhabbihii ay ku ordi lahayd, iyadoo ku dhacday meel u dhow xeebta Badweynta Hindiya. Inkastoo dhammaan 55-kii qof ee saarnaa ay ka badbaadeen, dhacdadaasi waxay dhalisay walaac la xiriira heerka kormeerka iyo dayactirka diyaaradaha.
Hay’addu waxay sidoo kale sheegtay in, iyadoo la tixgelinayo xoojinta isdhexgalka dhaqaale ee Bariga Afrika, la adkeynayo xeerarka la xiriira cabbirka kuraasta, tayada adeegga iyo habraacyada qiimeynta shirkadaha duulimaadyada, si loo ilaaliyo xuquuqda rakaabka Soomaaliyeed.
Dhanka kale, rakaabka u kala safra Muqdisho iyo Nairobi ayaa si isa soo taraysa uga cabanaya qiimaha sare ee tikidhada iyo ciriiriga diyaaradaha. Qiimaha safarka wareegga ah ee u dhexeeya labada magaalo ayaa gaaraya inta u dhaxaysa 400 ilaa 450 doollar, inkastoo masaafadu tahay qiyaastii 90 daqiiqo. Qaar ka mid ah rakaabka ayaa ku tilmaamay qiimahaas mid aan la jaanqaadi karin masaafada iyo heerka adeegga la helo.
Warbixinno laga helayo rakaabka ayaa muujinaya in qaar ka mid ah shirkadaha ka shaqeeya khadkaas ay adeegsadaan diyaarado yaryar oo kuraastooda si aad ah loo ciriiriyay si loo kordhiyo tirada rakaabka halkii duullimaad. Arrintan ayaa dhalisay cabashooyin la xiriira raaxo la’aan iyo meel yari.
Dadka dhaliilaya qaabka ganacsi ee jira ayaa ku doodaya in suuqan uu yahay mid xaddidan, maaddaama aysan jirin waddooyin dhuleed oo ammaan ah oo si fudud loogu beddeli karo duullimaadyada, taasoo yareyneysa tartanka isla markaana saameyn ku leh qiimaha iyo tayada adeegga.
