MUQDISHO, Febraayo 23, 2026 – Jamhuuriyadda Federaalka Soomaaliya ayaa si adag u cambaareysay weerarro argagixiso oo ka dhacay Gobolka Zamfara ee waqooyi galbeed dalka Nigeria, kuwaas oo sababay dhimashada in ka badan 50 qof oo rayid ah, isla markaana lagu afduubtay haween iyo carruur.
War ka soo baxay Wasaaradda Arrimaha Dibadda Soomaaliya ayaa lagu sheegay in dowladda ay garab istaag buuxa la garab taagan tahay Dowladda Federaalka Nigeria iyo shacabkeeda, iyadoo tacsi tiiraanyo leh u dirtay qoysaska ay ka geeriyoodeen dadkooda. Dowladda ayaa sidoo kale u rajeysay bogsasho degdeg ah dadka ku dhaawacmay weerarradaas.
“Jamhuuriyadda Federaalka Soomaaliya waxay ku baaqeysaa in si degdeg ah oo shuruud la’aan ah loo sii daayo dhammaan dadka la afduubtay, iyadoo taageereysa dadaallada dowladda Nigeria ee ku aaddan in caddaaladda la horkeeno kooxaha falalkan geystay,” ayaa lagu yiri bayaanka rasmiga ah.
Soomaaliya ayaa ku boorisay dalalka Afrika inay muujiyaan midnimo marka laga hortagayo argagixisada, isla markaana mudnaanta koowaad la siiyo ilaalinta rayidka.
Weerarradan ayaa qeyb ka ah falal amni darro oo muddooyinkii dambe ka jiray qaar ka mid ah gobollada waqooyi galbeed Nigeria. Dowladda Nigeria ayaa sheegtay inay waddo hawlgallo lagu soo badbaadinayo dadka la afduubtay iyo in la xakameeyo kooxaha ka dambeeya weerarradaas.
.
