ARUSHA – Madaxweynaha Jamhuuriyadda Federaalka Soomaaliya, Hassan Sheikh Mohamud, iyo wafdi uu hoggaaminayo ayaa gaaray dalka Tanzania si ay uga qayb galaan shir madaxeedka 25-aad ee hoggaamiyeyaasha dalalka ku mideysan East African Community (EAC), kaas oo ka furmaya magaalada Arusha 7-da Maarso 2026.
Madaxweynaha iyo wafdigiisa ayaa waxaa garoonka ku soo dhaweeyay mas’uuliyiin ka tirsan dowladda Tanzania iyo xubno ka socday safaaradda Soomaaliya ee dalkaas, ka hor inta aan loo gudbin goobta shirka oo ay ku sugan yihiin madaxda dalalka xubnaha ka ah ururka.
Shirkan oo ay ka qeyb galayaan hoggaamiyeyaasha siddeedda dal ee ku bahoobay EAC ayaa diiradda lagu saari doonaa xoojinta iskaashiga iyo isdhexgalka dalalka gobolka, horumarinta dhaqaalaha, kobcinta ganacsiga iyo maalgashiga, iyo dardargelinta mashaariic wadajir ah oo lagu horumarinayo Bariga Afrika.
Inta uu socdo shirka, Madaxweyne Xasan Sheekh Maxamuud ayaa la filayaa inuu jeediyo khudbad ku saabsan xoojinta iskaashiga gobolka, gaar ahaan dhinacyada dhaqaalaha, amniga iyo isku xirka bulshooyinka dalalka xubnaha ka ah ururka. Waxaa sidoo kale la qorsheynayaa inuu yeesho kulamo doceedyo uu la qaato qaar ka mid ah hoggaamiyeyaasha dalalka EAC si ay uga wada hadlaan xoojinta xiriirka iyo danaha ka dhexeeya Soomaaliya iyo dalalka gobolka.
Shirka sanadkan ayaa imanaya xilli ururka Bulshada Bariga Afrika uu sii ballaaranayo, iyadoo xubnaha ururka ay ka mid yihiin Burundi, Jamhuuriyadda Dimuqraadiga ah ee Congo, Kenya, Rwanda, Soomaaliya, Koonfurta Suudaan, Uganda iyo Tanzania.
Ajandaha kulanka waxaa sidoo kale ka mid ah ka doodista horumarka barnaamijyada gobolka, soo bandhigista istaraatiijiyadda 7-aad ee horumarinta EAC ee muddada 2026 ilaa 2031, iyo qorshayaal lagu xoojinayo isku xirka dhaqaalaha iyo ganacsiga dalalka xubnaha ka ah ururka.
Soomaaliya oo dhowaan ku biirtay Bulshada Bariga Afrika ayaa dadaal ku bixinaysa inay ka faa’iideysato fursadaha dhaqaale, ganacsi iyo iskaashi ee ka dhex jira dalalka gobolka, iyadoo ka qeybgalka shirka la filayo inuu xoojiyo doorka Soomaaliya ee ururka iyo xiriirka ay la leedahay dalalka Bariga Afrika.
