Madaxweynaha Koonfur Galbeed, Cabdicasiis Xasan Maxamed (Lafta-gareen), ayaa si rasmi ah ugu dhawaaqay inuu iska casilay xubinnimada Xisbiga Caddaaladda iyo Wadajirka (JSP), kaas oo uu hoggaamiyo Madaxweynaha Soomaaliya, Hassan Sheikh Mohamud.
War-saxaafadeed uu akhriyay afhayeenka maamulka Koonfur Galbeed, Ugaas Xasan Cabdi, ayaa lagu xaqiijiyay in Lafta-gareen uu sidoo kale ka tegay xilkii guddoomiye ku xigeenka arrimaha amniga iyo dowlad-goboleedyada ee xisbiga.
Go’aankan ayaa ku soo beegmaya xilli ay sii xoogeysanayaan xiisadaha siyaasadeed ee u dhexeeya Koonfur Galbeed iyo Dowladda Federaalka Soomaaliya, iyadoo maalmo ka hor maamulka uu ku dhawaaqay inuu joojiyay wada-shaqeyntii kala dhaxeysay dowladda dhexe.
Lafta-gareen ayaa sidoo kale ka hadlay arrimaha dastuurka, isagoo caddeeyay in uu aqoonsan yahay oo keliya dastuurkii kumeelgaarka ahaa ee la ansixiyay sanadkii 2012. Wuxuu sheegay in wax ka beddel kasta oo lagu sameeyo dastuurka iyadoo aan loo marin habraacyada sharciyeysan ay yihiin sharci-darro.
Madaxweynaha Koonfur Galbeed ayaa eedeyn u jeediyay dowladda federaalka, isagoo ku tilmaamay inay qaadayso tallaabooyin halis gelin kara midnimada dalka. Wuxuu sidoo kale sheegay in dowladda dhexe ay wado abaabul ciidan iyo dhaqdhaqaaqyo uu ku sifeeyay kuwo amni darro ka abuuraya deegaannada maamulka.
Sidoo kale, Lafta-gareen ayaa ugu baaqay Madaxweynaha Soomaaliya inuu isugu yeero Golaha Wadatashiga Qaran si looga wada hadlo arrimaha doorashooyinka dalka, isagoo ku taliyay in shirkan lagu qabto goob dhexdhexaad ah kahor 14-ka Abriil.
Tallaabadan ayaa sii xoojineysa khilaafka siyaasadeed ee u dhexeeya labada dhinac, iyadoo weli aan wax jawaab ah laga helin Dowladda Federaalka Soomaaliya oo ku aaddan go’aanka iscasilaadda.
