MUQDISHO, Maarso 31, 2026 – Ra’iisul Wasaaraha Xukuumadda Federaalka Soomaaliya, Xamsa Cabdi Barre, oo xalay khudbad ka jeediyay magaalada Muqdisho, ayaa si adag uga hadlay isbeddellada amni iyo kuwa siyaasadeed ee ka dhacay magaalada Baydhabo. Ra’iisul Wasaaraha ayaa xaqiijiyay in ciidamada dowladda federaalka ay si buuxda gacanta ugu hayaan amniga xarunta gobolka Baay, isagoo sheegay inaan loo dulqaadan doonin wax kasta oo wax u dhimaya xasilloonida.
Ra’iisul Wasaare Xamsa ayaa cadeeyay in dowladda federaalku aysan aqbali doonin wax kasta oo keeni kara kala aargoosi qabiil ama rabshado ka dhaca Baydhabo. Wuxuu si cad u sheegay in nidaamkii doorashada dadban uu dhammaaday, uuna maamulku hadda u jihaysanayo nidaamka doorashada qof iyo cod ah. Wuxuu hoosta ka xariiqay in dadka reer Koonfur Galbeed ay heli doonaan fursad ay ku soo doortaan hoggaan ay iyagu keensadeen oo aan lagu qasbin.
Isagoo ka hadlayay hoggaankii hore, Ra’iisul Wasaaruhu wuxuu dhaliil u jeediyay madaxweynihii iscasilay ee Koonfur Galbeed, Cabdicasiis Xasan Maxamed (Lafta-gareen). In kasta oo uu qiray in Lafta-gareen uu door muhiim ah ka soo qaatay barnaamijyada qaranka sida deyn cafinta iyo dhammaystirka dastuurka, haddana wuxuu tilmaamay inay nasiib darro tahay qaabka ay ku soo dhammaatay taariikhdiisa siyaasadeed, isagoo ku sifeeyay mid “liidata”.
Sidoo kale, Ra’iisul Wasaare Xamsa ayaa weerar afka ah ku qaaday siyaasiyiinta mucaaradka ee taageerada u muujiyay hoggaankii hore, isagoo ku tilmaamay tallaabadooda mid aan miisaan lahayn. Wuxuu digniin u jeediyay cid kasta oo isku dayaysa inay carqaladeyso qorshaha dowladda ee ku aadan dimuqraadiyeynta dalka iyo doorashooyinka tooska ah ee la qorsheynayo.
Isbeddelkan ayaa yimid ka dib markii ciidamada federaalka iyo kuwa deegaanka ay si buuxda ula wareegeen magaalada Baydhabo, taas oo keentay in madaxweyne Lafta-gareen uu u dhoofo dalka Kenya. Intaanu bixin ka hor, wuxuu ku-simaha madaxweynaha u magacaabay wasiirka maaliyadda Koonfur Galbeed, Axmed Maxamed Xuseen, kaas oo sii hayn doona xilka inta laga gaarayo go’aan dhab ah oo laga gaaro hoggaanka cusub ee maamulka.
